Основното јавно обвинителство за гонење организиран криминал и корупција (ОЈО ГОКК) отвори истражна постапка против две лица осомничени за примање награда за противзаконито влијание и примање поткуп во врска со полагање стручен испит за стоматолози.
Според Обвинителството, предметот е оформен врз основа на докази обезбедени од анализата на мобилни телефони одземени во рамките на друга истрага што се води против организирана криминална група поврзана со нелегален увоз, дистрибуција и апликација на медицински лекови и медицински помагала.
Според досегашните сознанија, во декември 2025 година осомничена во таа истрага му дала парична награда на првоосомничениот, доктор по стоматологија и претседател на Стоматолошкото друштво на Албанците, за да посредува и да влијае врз полагањето на нејзиниот стручен испит.
Како што наведува Обвинителството, тој интервенирал кај второосомничениот, претседател на Испитната комисија за полагање стручен испит за здравствени работници од областа на стоматологијата, барајќи да ѝ се овозможи успешно да го положи испитот.
По завршувањето на испитот, првоосомничениот ги доставил податоците од својата трансакциска сметка, по што осомничената извршила уплата како награда за посредувањето. Според обезбедените докази, дел од добиените средства му биле предадени на второосомничениот.
Во текот на денот двајцата осомничени ќе бидат изведени пред судија на претходна постапка во Основниот кривичен суд Скопје, а јавниот обвинител ќе побара определување мерки за обезбедување на нивното присуство во текот на кривичната постапка.
