Полицајци упаднаа во Тетово: Кај сопственикот пронајдени 15 пакувања со сомнителна материја

Полицијата пронашла 15 пакувања со бела прашкаста материја кај сопственик на угостителски објект во Тетово, а уште едно лице било приведено откако кај него била пронајдена слична материја. Двајцата се лишени од слобода во рамки на акциска контрола спроведена денеска во Градскиот трговски центар.

— реклама —

Според информациите од Министерството за внатрешни работи, акцијата ја спровеле полициски службеници од Отсекот за криминалистичка полиција при СВР Тетово и мобилниот тим „Task Force“, во координација со Државниот пазарен инспекторат и Управата за јавни приходи.

— реклама —

Пред угостителскиот објект бил затекнат М.Р. (48) од Тетово, кај кого при преглед била пронајдена бела прашкаста материја, по што бил приведен.

— реклама —

При контролата во внатрешноста на објектот, кај сопственикот Ј.Т. (54) од тетовското село Требош биле пронајдени 15 пакувања со бела прашкаста материја, по што и тој бил лишен од слобода.

Двајцата се задржани во полициска станица, а од МВР најавуваат дека по целосното документирање на случајот против нив ќе бидат поднесени соодветни пријави.