Полицијата во Пловдив уапсила 18 лица поврзани со меѓународната неонацистичка организација „Крв и чест“. При претрес во приватен клуб биле пронајдени предмети со неонацистичка содржина.
Како што соопшти директорот на Обласната дирекција на бугарското Министерство за внатрешни работи во Пловдив, Васил Костадинов, лицата биле приведени во клуб спроти Младинскиот Рид, каде што синоќа се собрале за да го следат фудбалскиот натпревар меѓу „Лудогорец“ и „Ботев“ од Пловдив.
Приведените се осомничени за кривично дело поврзано со пропагирање дискриминација, насилство или омраза врз основа на раса, националност или етничка припадност. Дел од нив и претходно биле евидентирани во полицијата, а меѓу нив има и лица со претходни кривични пресуди.
Особено внимание предизвикува фактот што меѓу уапсените е и полнолетниот млад човек кој беше поврзан со неодамнешниот случај на напад врз непалски државјани, како и неговиот татко и брат. Младиот човек бил пуштен од притвор пред само четири дена.
Костадинов информираше дека меѓу 18-те приведени има и три девојки, од кои едната е 17-годишна и во септември треба да наполни 18 години.
Според полицијата, клубот не работи постојано како угостителски објект, туку во него периодично се собирале луѓе во изминатите две години. Закупецот на просторот е еден од приведените.
До групата истражителите дошле во рамки на заедничка работа со бугарската Државна агенција за национална безбедност (ДАНС).
Сите 18 лица се задржани во полициски станици до 24 часа. За дел од нив се очекува да следува ослободување, додека истрагата и процесните дејствија продолжуваат и на други локации.
