Полицијата казни 2.720 возачи за три дена, најмногу за пребрзо возење

Полицијата регистрирала 2.720 сообраќајни прекршоци низ Македонија во периодот од 23 до 25 октомври, а 67 лица биле лишени од слобода поради безобѕирно управување со возило, информира Министерството за внатрешни работи.

— реклама —

Од вкупниот број прекршоци, 1.360 се однесуваат на возачи кои не ја почитувале пропишаната брзина. Меѓу лишените од слобода, седуммина возеле под дејство на алкохол, 21 без возачка дозвола, а осуммина и покрај претходно изречена забрана за управување со возило.

— реклама —

Во истиот период биле одземени 27 возила, а полицијата регистрирала и 328 прекршоци за неправилно паркирање. Дополнително, 57 возачи биле санкционирани за возење под дејство на алкохол.

— реклама —

Санкционирани биле и 33 мотоциклисти кои не носеле заштитен шлем, како и 239 учесници во сообраќајот кои не користеле сигурносен појас. Од сообраќај биле отстранети 23 нерегистрирани возила и четири технички неисправни возила. Осум возачи биле казнети поради несоодветно затемнување на стаклата.

Од МВР најавуваат дека контролите ќе продолжат и во наредните денови, со апел до сите учесници во сообраќајот да ги почитуваат правилата и прописите.