Полицијата санкционираше 606 возачи на електрични тротинети, одземени 18 возила

Во текот на август, полицијата спровела засилени сообраќајни контроли низ целата држава за прекршоците што ги прават возачите на лесни електрични возила, при што биле евидентирани 606 прекршоци, соопшти Министерството за внатрешни работи.

— реклама —

Најголем број санкции, 162, биле изречени поради неносење рефлектирачки елек при управување со електричен тротинет во ноќни услови. Следуваат 134 прекршоци поради некористење велосипедска или пешачка патека, 59 поради неносење заштитен шлем, 45 поради превезување две лица и 20 прекршоци за малолетници кои управувале електричен тротинет.

— реклама —

Во рамки на контролите биле одземени и 18 електрични тротинети, во времетраење од 30 дена.

Најмногу прекршоци биле констатирани на подрачјето на СВР Битола – 236, потоа СВР Скопје со 97, СВР Струмица со 82, СВР Охрид со 57, СВР Тетово со 27, СВР Велес со 18, СВР Штип со 13 и СВР Куманово со седум. Мобилната единица за безбедност во сообраќајот констатирала дополнителни 69 прекршоци.

— реклама —

За време на акциите биле утврдени и 3.665 други сообраќајни прекршоци. За сите случаи биле преземени соодветни мерки и изречени санкции согласно законските прописи.

— реклама —

Од МВР најавуваат дека засилените сообраќајни контроли продолжуваат, со цел зголемување на безбедноста на сите учесници во сообраќајот и доследно почитување на правилата и прописите.