Полициски службеници од СВР Струмица – ОВР Гевгелија денеска околу 4:00 часот во Стар Дојран лишиле од слобода 35-годишен полициски службеник од Ресен, осомничен дека физички нападнал жена со која бил во љубовна врска и нејзиниот малолетен син.
Според информациите од Министерството за внатрешни работи, постапено е по претходна пријава дека на 1 и 2 август во Стар Дојран тој физички нападнал 36-годишна жена од Прилеп и нејзиниот малолетен син.
За случајот бил известен јавен обвинител од Основното јавно обвинителство Гевгелија, по чии насоки се преземаат мерки за целосно расчистување на настанот. По завршување на постапката, против осомничениот ќе биде поднесена соодветна пријава.
Од МВР информираат дека за случајот е известен и Одделот за внатрешна контрола, криминалистички истраги и професионални стандарди при Министерството за внатрешни работи.
