Полициски службеник од Кратово е лишен од слобода поради сомнение дека, додека не бил службено ангажиран, испукал повеќе куршуми од својот службен пиштол во близина на угостителски објект, информира Министерството за внатрешни работи.
Според МВР, на 1 август во 12:15 часот, полициски службеници од ОВР Кратово го привеле М.Н. (34) од кратовско село, кој е вработен како полициски службеник во Министерството за внатрешни работи.
Тој се сомничи дека истиот ден, во период кога не бил службено ангажиран, во близина на угостителски објект во Кратово испукал повеќе куршуми од неговиот службен пиштол.
По приведувањето, тој бил задржан во полициска станица, а од Одделот за внатрешна контрола, криминалистички истраги и професионални стандарди, во координација со Основното јавно обвинителство, се преземаат мерки за целосно расчистување на случајот.
