Полициски службеник надвор од работно време пукал во воздух со службениот пиштол пред угостителски објект и на плоштад во Кратово

Полициски службеник се соочува со кривична пријава за предизвикување општа опасност, откако во два наврати испукал повеќе куршуми во воздух со службениот пиштол во Кратово, информира Министерството за внатрешни работи.

— реклама —

Одделот за внатрешна контрола, криминалистички истраги и професионални стандарди при МВР поднел кривична пријава до Основното јавно обвинителство во Куманово против М.Н., поради сомнение за сторено кривично дело „предизвикување општа опасност“ според член 288 од Кривичниот законик.

— реклама —

Според информациите од МВР, пријавениот е вработен во Одделот за специјални полициски операции. На 1 август 2026 година, надвор од работното време, тој во два наврати испукал повеќе куршуми во воздух со службениот пиштол што го задолжил. Првиот инцидент се случил пред угостителски објект, а вториот на плоштадот во Кратово.

— реклама —

Покрај кривичната пријава, Одделот за внатрешна контрола ќе поднесе и предлог за поведување постапка за утврдување одговорност поради кршење на работниот ред и дисциплина.

Од МВР најавуваат дека на полицискиот службеник ќе му биде изречена мерка отстранување од работното место, односно суспензија, до завршувањето на дисциплинската постапка.