Русија го засилила политичкиот и пропагандниот притисок врз германскиот канцелар Фридрих Мерц, користејќи ја економската криза, слабеењето на владината коалиција и растот на крајната десница, пишува „Политико“.
Според анализата, Кремљ се обидува да го ослабне Мерц, кој важи за еден од најсилните европски поддржувачи на Украина и клучен противник на рускиот претседател Владимир Путин.
„Русија во Европа бара партнери кои може да ги искористи за свои цели, а целта е, секако, во блиска иднина да ја доведе АфД на власт“, изјавил Крис Шуленбург, пратеник од ЦДУ во Саксонија-Анхалт.
Во текстот се наведува дека Москва последните недели го зголемила притисокот врз Берлин, меѓу другото и со прекин на испораките на казахстанска нафта кон источна Германија преку руски нафтовод.
Паралелно, Кремљ се обидувал да внесе поделби во германската јавност преку предлог поранешниот канцелар Герхард Шредер да биде посредник во мировните преговори за Украина.
Еден од советниците на Путин, според „Политико“, поканил и политичари од АфД на економскиот форум во Санкт Петербург.
Кремљ, како што се наведува, ја користи растечката економска несигурност во Германија и незадоволството од воената поддршка за Украина, претставувајќи го Мерц како „неефикасен“ и „одвоен од реалноста“.
„Без руски гас, Германија не оди само кон долгорочна стагнација, туку кон непосреден и неповратен економски колапс“, напишал Кирил Дмитриев, близок сојузник на Путин.
Таквите пораки ги повторуваат и политичари од АфД, кои бараат повторно активирање на гасоводот „Северен тек“.
Лидерката на АфД, Алис Вајдел, изјавила дека нејзината партија е подготвена да разговара со Путин за мир.
„Влада предводена од АфД ќе се залага за мир со Русија, за помирување и дијалог“, рекла Вајдел.
Според експертите цитирани во анализата, источна Германија е особено чувствителна на проруските пораки, поради историските врски и економските проблеми.
„Ако Русите во нешто се добри, тоа е препознавање на слабостите на своите противници и нивно искористување“, изјавил Стефан Мајстер од Германскиот совет за надворешни односи.
„Политико“ наведува и дека проруската мрежа „Правда“ значително го зголемила бројот на текстови насочени против Мерц, а аналитичарите предупредуваат дека ваквите содржини имаат влијание и врз системите за вештачка интелигенција кои генерираат резимеа и информации.
