Поради градежните активности што се одвиваат во рамки на целосната реконструкција на Граничниот премин „Делчево“, од 10 септември е воведен времен режим на сообраќај, информира Министерството за внатрешни работи.
Во периодот додека траат работите, моторниот сообраќај при влез и излез од државата ќе се одвива по една сообраќајна лента во секој правец. Поради намалениот капацитет на граничниот премин, од МВР предупредуваат дека се можни подолги задржувања.
Граѓаните кои имаат можност се повикуваат да ги користат соседните гранични премини, со што би се избегнале подолги чекања и би се овозможило полесно одвивање на сообраќајот.
Од МВР апелираат до сите учесници во сообраќајот за трпение и внимателно возење, како и за доследно почитување на поставената сообраќајна сигнализација и насоките од надлежните служби.
