Поранешен соработник на украински премиер тешко повреден во експлозија на автомобил во Москва

Поранешниот портпарол на украинскиот премиер Микола Азаров, Сергеј Заворотниј, бил повреден во експлозија на автомобил во Москва, објавија руски медиуми.

Според весникот „Комерсант“, Заворотниј, кој бил близок соработник на Азаров, е хоспитализиран по експлозијата во московската област Чертаново.

— реклама —

Телевизијата РЕН ТВ и телеграм-каналот „112“ објавија дека во експлозијата ја загубил левата рака, а се здобил и со потрес на мозокот, скршеници на ребрата и други повреди.

— реклама —

Ова е втор ваков напад во Русија во последните два дена, наведува „Ројтерс“. Москва и претходно ја обвинуваше Украина за атентати врз високи воени функционери и лица поврзани со руските воени активности.

Азаров, кој беше премиер на Украина од 2010 до 2014 година, во петокот за руската државна агенција ТАСС изјавил дека нема информации за експлозијата, освен дека Заворотниј ја преживеал.

— реклама —

По соборувањето на прорускиот претседател Виктор Јанукович за време на протестите на Мајдан во 2014 година, Азаров побегнал во Русија. Украинските власти засега не го коментирале нападот.

— реклама —

Ден претходно, во Санкт Петербург беше убиен припадник на руската војска. Киев во некои претходни случаи преземал одговорност за напади во Русија, додека други ги негирал.