Поранешниот командант на ОВК, Насим Харадинај, упати остри предупредувања за можни последици во регионот доколку Специјализираните совети во Хаг донесат осудителни пресуди за поранешните лидери на ОВК, пренесува косовскиот медиуми „Зери“.
Во гостување на телевизијата Т7, Харадинај изјавил дека евентуална затворска казна за Хашим Тачи, Кадри Весели, Реџеп Селими и Јакуп Красниќи би предизвикала жестока реакција, не само на Косово, туку и меѓу албанското население во регионот. Според него, пресудата најавена за 16 септември би можела сериозно да влијае врз стабилноста.
Харадинај се осврнал и на најавите дека одредени лица би можеле да ја прослават евентуалната осудителна одлука, предупредувајќи дека таквиот чин би можел да има сериозни последици.
Тој оценил дека судскиот совет во Хаг треба да ги има предвид можните последици од својата одлука, бидејќи, според него, осудителна пресуда би можела да предизвика дестабилизација и хаос во регионот.
Харадинај притоа порача дека во случај на осудителна пресуда „Косово, Албанија и Македонија ќе горат во пламен“, што претставува директно предупредување за можна ескалација на состојбите.
