Поранешна хотелска вработена открива што секогаш треба да проверите во хотелска соба за да избегнете непријатни изненадувања.
Поранешна вработена во хотелската индустрија, Натали Бруксон, по долгогодишно искуство предупредува дека гостите често не се свесни за ризиците што можат да ги затекнат во хотелските соби и советува неколку едноставни проверки веднаш по влегувањето.
Таа истакнува дека еден од најголемите проблеми во хотелите се стениците, за кои вели дека контролите се прават многу поретко отколку што луѓето мислат. Според неа, во хотелскиот синџир каде што работела, само околу 10 проценти од собите редовно се проверувале. Поради тоа, таа ги советува гостите сами да го прегледаат креветот, особено шевовите и аглите на душекот, каде што најчесто се кријат овие инсекти. Како знаци за нивно присуство наведува и ситни дамки од крв или необичен мирис во собата.
Покрај стениците, Бруксон предупредува и на уште една важна навика — користење наддушек или заштита за кревет, бидејќи на душеците често остануваат траги од претходни гости, кои не се секогаш соодветно исчистени.
Таа додава дека гостите треба да бидат внимателни и со декоративните перници, за кои вели дека ретко се перат, како и со чашите во собата, кои е препорачливо да се измијат пред употреба.
Експертите за контрола на штетници предупредуваат дека стениците можат да преживеат долго време без храна и брзо да се размножуваат, што значи дека дури и еден примерок може да доведе до сериозна зараза. Поради тоа, советуваат багажот да се држи подалеку од креветот, а облеката да се чува во затворени торби за да се намали ризикот од нивно пренесување дома.
