Иако Ролан Гарос сè уште не е започнат, на тениската сцена веќе почнаа првите сериозни прогнози за Вимблдон.
Особено во Велика Британија, каде што тревнатиот гренслем-турнир е еден од најважните спортски настани во годината, внимателно се следи состојбата со повредата на Карлос Алкарас.
Поранешниот светски рекет број еден, Грег Руседски, смета дека настапот на шпанскиот тенисер на Вимблдон е под голем знак прашалник поради проблемите со зглобот на раката.
„Не верувам дека Карлос Алкарас ќе биде подготвен за Вимблдон“, изјави Руседски во својот подкаст.
„Неговата повреда е сериозна. Се сеќаваме колку страдаше Хуан Мартин дел Потро поради такви проблеми. На сите ќе ни недостига, но мислам дека ќе ја донесе вистинската одлука. Не смее прерано да се врати на терените“, додаде тој.
Руседски потсети дека проблемите со зглобот не само што ја нарушиле кариерата на аргентинскиот ас Дел Потро туку сериозно го забавиле и Доминик Тим, кој по пребрзото враќање никогаш не успеал да се врати на препознатливото ниво.
Алкарас последниот меч го одигра во Барселона пред повеќе од еден месец, а веќе е познато дека нема да настапи ниту во наредните недели, вклучително и на Ролан Гарос.
Постои можност Шпанецот да се врати на турнирот во Квинс, две недели пред Вимблдон, но засега нема официјална потврда.
Токму поради ваквата ситуација, Руседски смета дека Новак Ѓоковиќ би можел да добие голема шанса повторно да го нападне трофејот на лондонската трева.
Српскиот тенисер моментално го дели второто место на вечната листа во опен-ерата по бројот на освоени титули на Вимблдон со Пит Сампрас, додека пред него е само Роџер Федерер.
„Мислам дека Ѓоковиќ размислува дека, во отсуство на Алкарас, тоа е негова голема шанса за титула. Неговата цел е да пристигне на Вимблдон што е можно поздрав и подготвен. Ќе се обиде на Ролан Гарос да одигра мечеви што му недостигаат, можеби ќе настапи и на некој турнир на трева и ќе се обиде врвот на формата да го достигне во Лондон. Новак никогаш не смее да се отпише“, изјави Руседски.
Поранешниот британски тенисер истакна дека и понатаму силно верува во можностите на Ѓоковиќ и покрај годините и сè посилната конкуренција.
„Ако е здрав и физички подготвен, може да победи кого било. Тој и понатаму е доволно добар. Но мислам дека следните недели ќе бидат клучни“, заклучи Грег Руседски.
