Поротата во Ново Мексико ја прогласи компанијата „Мета“ за одговорна за измама на корисниците во врска со заштитата на нивната приватност, утврдувајќи повеќе од 43 милиони прекршувања на Законот за заштита на потрошувачите.
За висината на казната судијата треба да одлучува на 1 октомври. Доколку биде прифатено барањето на државата за максимална казна од 5.000 долари за секое прекршување, вкупната сума би можела да надмине 200 милијарди долари.
Случајот е поврзан со скандалот „Кембриџ Аналитика“, во кој податоци од околу 87 милиони кориснички профили на „Мета“ биле собрани и продадени на компанија за политички консалтинг, за потребите на целно рекламирање.
Поротата утврдила и дека „Мета“ ја довела јавноста во заблуда во врска со истрагите за апликации од трети страни кои собирале податоци од корисниците.
Од друга страна, не било утврдено дека компанијата дала лажни тврдења во врска со отстранувањето штетна содржина, меѓу која и дезинформации поврзани со коронавирусот.
Од „Мета“ ја отфрлиле пресудата, оценувајќи дека доказите на државата се застарени. Компанијата истакнала и дека ги променила своите политики откако во 2021 година била поднесена тужбата.
Ново Мексико бара и забрана за практиките што се предмет на спорот. Државниот обвинител Раул Торес изјавил дека средствата од евентуалната казна би биле насочени во фонд за образование.
Ова не е прв голем случај поврзан со „Мета“ во Ново Мексико. Државата претходно добила 942 милиони долари од компанијата во случај поврзан со заштитата на малолетниците.
