Поштар од Чапљина, БиХ, исчезнал со десетици пензии што требало да им ги достави на корисниците, а според медиумските информации, по исчезнувањето заминал во Сараево, потоа отпатувал во Турција, додека крајната дестинација на неговото патување наводно е Тајланд.
Министерството за внатрешни работи на Херцеговско-неретванскиот кантон потврдило дека е започната потрага по поштарот С. Ј., објавува N1.
Поштарот во саботата, на 5 септември, заминал со пријатели во Мостар, по што му се губи трагата. Последен пат разговарал со мајка му во неделата околу 20:50 часот преку WhatsApp, по што повеќе не се јавувал.
Според информациите што ги објави Hercegovina.info, тој прво преноќил во хотел во Мостар, потоа заминал за Сараево, а од таму со авион отпатувал во Турција.
Според авионскиот билет што го купил, крајната дестинација е Бангкок.
Засега не е соопштено колкава сума пензии ја понел со себе. Случајот го проверуваат и Хрватските пошти Мостар, кои потврдиле дека се запознаени со случајот и дека спроведуваат внатрешна проверка, но не откриваат детали.
Проверките следуваат откако во медиумите се појавија информации дека дел од корисниците на пензии во подрачјето на Чапљина не ги добиле средствата што требало да им бидат доставени.
Од Хрватските пошти Мостар уверуваат дека корисниците не треба да стравуваат дека ќе останат без своите пензии поради случајот.
