Здравствените власти остануваат на одлуката проблемот со зависниците на метадонска терапија да го решат со дисперзија. Наместо сите 530 корисници да земаат метадон во Центарот во Кисела Вода, ке бидат префрлени во повеќе општини.
„Постигнат е концензус кој овозможува да продолжи процесот за дисперзија на програмата за третман и превенција од зависности од Дневниот центар во Кисела Вода, во поликлиниките во Аеродром и Ченто, како и во Психијатриската болница во Бардовци. Дел од зависниците од дрога ќе се лекуваат како и досега во Центарот за зависници во Кисела Вода и во Општата градска болница „8 Септември“, истакна министерот за здравство Венко Филипче, на денешниот брифинг со новинарите откако вчера имаше средба со градоначалниците на општините Гази Баба и на Кисела Вода, Борис Георгиевски и Филип Темелковски, со директорот на Психијатриската болница Скопје, Ќамил Ковачи, со претставници на општините Аеродром и Карпош и со здруженија на граѓани.
Министерот додаде дека пациентите, терапијата ќе ја земаат во присуство на доктор,а со тоа ќе се отстрани можноста за препродавање надвор од болниците, што значи дека и сегашната слика на расфрлени шприцови и игли комплетно ќе се заборави, вели Филипче.
