Адвокатката Павлина Зефиќ реагира на соопштението на Судскиот совет и Здружението на судиите по повод одлуката на Уставниот суд за постапувањето на судија од Основниот граѓански суд.
Според неа, главниот аргумент во реакциите е дека одлуката на судијата не е правосилна и дека за неа допрва треба да одлучува Апелациониот суд, поради што институциите треба да бидат внимателни за да не влијаат врз исходот на постапката.
Зефиќ вели дека никој не ја спори судската независност, но оти во јавноста премногу често се зборува за независноста, а многу поретко за одговорноста на судиите.
„Не може независноста да значи дека судијата може да занемари конечна и извршна одлука на Уставниот суд или пресуда на Европскиот суд за човекови права, а потоа сè да заврши со објаснување дека тоа било негово ‘судиско убедување’ или ‘толкување на законот’“, наведува таа.
Според Зефиќ, особено е важно да се утврди што се случило во конкретниот предмет и дали станувало збор за различно правно мислење, пропуст, крајна небрежност или свесно занемарување на конечна и извршна одлука.
Таа смета дека Судскиот совет, доколку оцени дека сега не треба да расправа за случајот поради постапката пред Апелациониот суд, треба да го стори тоа откако ќе биде донесена второстепената одлука.
„Затоа што независност без одговорност не води кон доверба во судството“, порача Зефиќ, додавајќи дека Судскиот совет не треба само да ја штити независноста, туку и да се занимава со одговорноста на судиите кога за тоа постојат основи.
Таа бара одговор од институциите што се случува кога конечна и извршна одлука на Уставниот суд нема да биде спроведена.
„Ако одговорот е – ништо, тогаш проблемот е многу поголем од овој конкретен предмет“, заклучува Зефиќ.
