„Постојат ли 80 милиони евра во Алта банка Битола и во кое својство преговара Мицкоски?“, велат од СДСМ

СДСМ преку соопштение повторно побара институционална реакција во врска со работењето на „Алта банка“ во Македонија, поставувајќи прашање дали во битолската банка навистина постојат 80 милиони евра во готовина или соодветни парични еквиваленти, колку што, според партијата, се наведени во билансот.

— реклама —

Од СДСМ се повикуваат на случувањата во Србија, каде што, како што наведуваат, за „Алта банка“ е отворена стечајна постапка, уапсен е сопственикот Мацура и се води истрага поврзана со сомнителен капитал и износ од 380 милиони евра.

— реклама —

Партијата тврди дека во српската банка било утврдено оти парите не се наоѓале физички во трезорот, туку постоеле само како сметководствено заведени износи. Затоа бараат претседателот на Советот на Народната банка, Трајко Славески, јавно да објасни дали средствата наведени во билансот на „Алта банка Битола“ навистина постојат.

СДСМ се повикува и на изјава на Славески, во која тој потврдил дека за одлуката поврзана со влезот на „Алта банка“ во Македонија разговарал со премиерот Христијан Мицкоски, наведувајќи дека станувало збор за „политичка сензитивност“.

— реклама —

Од партијата оценуваат дека ова отвора прашања за независноста на Народната банка и улогата на премиерот во процесот. Тие тврдат дека Мицкоски бил клучен во носењето на банката во Македонија и прашуваат во кое својство сега преговара за нејзина продажба.

— реклама —

СДСМ бара Обвинителството веднаш да отвори истрага и да утврди дали имало неправилности при влезот на „Алта банка“ на македонскиот пазар, како и дали постои одговорност кај инволвираните лица.