Потона товарен брод кај бугарскиот брег, 11 морнари се водат како исчезнати

Единаесет морнари се водат како исчезнати откако товарен брод потона по напад со дронови во близина на бугарскиот брег, во Црното Море. Во истиот период бил погоден и друг брод, а инцидентите ја натераа Бугарија да го повика рускиот амбасадор.

Бугарските власти соопштија дека два товарни брода биле погодени во текот на ноќта, при што едниот потонал во близина на селото Крапец. Пет членови на екипажот биле спасени, додека 11 се водат како исчезнати. Според бугарските медиуми, потонатиот брод се викал „Азов Конкорд“.

— реклама —

Другиот брод, „Челси 3“, кој пловел под малтешко знаме, бил погоден со три дрона. Сите 15 членови на екипажот, седум Украинци и осум Азербејџанци, биле спасени без посериозни повреди.

— реклама —

Бугарија засега не ја обвини директно Русија за нападите, но премиерот Румен Радев изјави дека нивниот исход ѝ оди во прилог на Руската Федерација. Тој ги оцени нападите како неприфатливи бидејќи се случиле во непосредна близина на бугарските територијални води. Од Москва засега нема реакција.

Нападите ги осудија и Украина и Европската Унија. Претседателката на Европската комисија, Урсула фон дер Лајен, изјави дека Црното Море станува нов фронт на ескалација на руската војна во Украина и порача дека одговорните треба да сносат последици.

— реклама —

Украинскиот министер за надворешни работи, Андриј Сибиха, оцени дека нападот повторно покажува оти Москва намерно ги занемарува животите на цивилите. Тој предупреди дека Црното Море е од суштинско значење за глобалната безбедност на снабдувањето со храна.

Ова е втор смртоносен инцидент со потонување на товарен брод во областа во рок од една недела. Пред седум дена, по напад со дронови врз брод во ексклузивната економска зона на Бугарија во Црното Море, исчезнале девет сириски и еден египетски морнар.

Воените дејства сè повеќе го зафаќаат поморскиот сообраќај во Црното Море. Русија ги напаѓа украинските пристаништа, поради што Украина сè повеќе се потпира на пристаништата на Дунав и на поморските рути покрај Бугарија и Романија. Украина, од друга страна, сè почесто цели кон руски бродови што превезуваат жито во други делови на Црното Море и во Азовското Море.