Службите за итни случаи во Њујорк денеска одговориле на повикот на жителите на островот Рузвелт, кои пријавиле земјотрес и „мали експлозии“, за кој постои сомневање дека бил земјотрес со јачина од 1,7 степени според Рихтеровата скала, јавуваат американските медиуми.
Официјалните лица, кои излегоа на терен и ја пребараа областа, вклучително и неколку згради, не ја нашле причината за овие пријави, испратени непосредно пред 6 часот по локално време, пренесува NBC.
Тамошната полиција соопшти дека „се сомнева дека енергетски трансформатор можеби го предизвикал инцидентот“.
„Потенцијални експлозии предизвикаа прекин на електричната енергија на островот Рузвелт“, објави ABC.
Американските власти објавија дека постои сомневање дека земјотрес со јачина од 1,7 степени според Рихтеровата скала ги вознемирил жителите на островот Рузвелт и предизвикал утринава прекин на електричната енергија.
Американскиот геолошки институт извести за земјотрес во близина на Асторија, Квинс, а засега нема извештаи за штети или повредени.
Земјотресот бил пријавен во 5 часот и 45 минути по локално време, во исто време кога биле примени повици од островот Рузвелт и околните места, а жителите на овие делови на Њујорк за американските медиуми изјавиле дека ги разбудил силен звук и дека почувствувале дека се „тресат“ зградите во кои живеат.
