Потрошувачката кошница на Министерството изнесува 58.475 денари, а синдикалната околу 69.000 денари

Колку средства му се потребни на едно четиричлено семејство за да ги покрие основните месечни трошоци, според пресметката на Министерството за економија и труд, во август биле потребни 58.475 денари, додека синдикалната минимална кошница за септември достигнала 69.432 денари.

Од вкупната сума пресметана од Министерството, 21.132 денари биле наменети за храна и пијалаци, а 1.429 денари за здравствени услуги.

— реклама —

Министерот за економија и труд, Бесар Дурмиши, ја претстави методологијата според која е изработена потрошувачката кошница. Пресметките се засноваат на податоци од Државниот завод за статистика, цени од осум градови, информации од 23 пазари за овошје и зеленчук, како и податоци за најпродаваните прехранбени производи во најголемите трговски синџири.

Според Дурмиши, августовската кошница е поскапа за 29 денари во споредба со јули, додека трошоците за храна и пијалаци се намалиле за 255 денари. Во однос на јануари, кога пресметаната вредност изнесувала 56.381 денар, потребните средства се зголемиле за околу 2.095 денари, односно за 3,7 проценти.

— реклама —

Министерот објасни дека методологијата на Министерството се разликува од онаа на синдикатите и дека се заснова на податоци за реалната просечна потрошувачка на домаќинствата.

„Не сакаме да навлегуваме во натпревар чија кошница е повисока или пониска. Нашата цел не е да ги минимизираме трошоците на граѓаните, туку да обезбедиме објективна и транспарентна слика за потрошувачката“, изјави Дурмиши.

При изработката биле земени предвид и податоците од последниот попис, според кои 95 проценти од населението живее во сопствен дом. Новата методологија треба да биде разгледана на седницата на Економско-социјалниот совет, закажана за 19 октомври, на која се очекува да се разговара и за минималната плата.

— реклама —

Во меѓувреме, Сојузот на синдикатите на Македонија објави дека вредноста на минималната синдикална кошница во септември достигнала 69.432 денари. Тоа е зголемување за 757 денари во однос на претходниот месец.

Синдикалните пресметки покажуваат дека за една година минималните трошоци за живот се зголемиле за 4.355 денари, а за две години за 8.126 денари. Од почетокот на годинава до септември, вредноста на кошницата пораснала за 3.019 денари.

Најголем дел од семејните расходи отпаѓаат на храната и пијалаците, за кои во септември биле потребни 25.259 денари, односно 36,4 проценти од вкупната вредност на кошницата. За четиричлените семејства што живеат под кирија, проценетите месечни трошоци достигнуваат 84.807 денари.

Опозициските партии реагираа дека разликата меѓу приходите и трошоците за живот станува сè поголема, посочувајќи дека ниту две минимални плати веќе не се доволни за покривање на основните потреби. Од ССМ предупредуваат дека поскапувањето на храната, домувањето, превозот, образованието и здравствените услуги продолжува да претставува дополнителен товар за семејните буџети.