Потврдени идентитетите на над 225.000 загинати руски војници во војната во Украина

Независниот руски медиум „Медиазона“ и рускиот сервис на Би-Би-Си објавија дека досега ги потврдиле идентитетите на 225.019 руски војници загинати во војната против Украина.

Во споредба со последната објава на крајот на мај, на списокот се додадени уште 3.813 загинати војници.

— реклама —

Авторите на истражувањето нагласуваат дека нивните податоци се базираат исклучиво на јавно достапни извори, меѓу кои посмртници, објави на членови на семејствата, извештаи од локални медиуми и официјални соопштенија на регионалните власти.

Поради тоа, предупредуваат дека реалниот број на загинати руски војници веројатно е значително поголем од потврдениот.

Според нивните податоци, меѓу идентификуваните загинати има повеќе од 82.400 доброволци, околу 25.400 затвореници регрутирани за учество во војната и приближно 19.000 мобилизирани војници.

— реклама —

Потврдена е и смртта на 7.226 офицери.

Во меѓувреме, западните проценки укажуваат на уште поголеми загуби. Американскиот Центар за стратешки и меѓународни студии (CSIS) претходно процени дека руските загуби се два до два и пол пати поголеми од украинските.

— реклама —

Украинскиот претседател Володимир Зеленски претходно изјави дека односот на загинати е приближно еден украински војник на пет до шест руски војници.

Шефицата на британската разузнавачка агенција GCHQ, Ен Кист-Батлер, кон крајот на мај изјави дека од почетокот на целосната руска инвазија загинале речиси 500.000 руски војници.

Од друга страна, украинскиот Генералштаб проценува дека Русија од почетокот на војната изгубила околу 1,38 милиони војници, бројка која ги вклучува загинатите, ранетите, исчезнатите и заробените.

— реклама —

Русија не објавува официјални податоци за воените загуби од почетокот на војната, додека украинските власти во февруари соопштија дека најмалку 55.000 украински војници загинале на фронтот од почетокот на инвазијата.

Новите податоци се објавени во период кога Украина тврди дека во последните месеци презела иницијатива на делови од фронтот и дека во текот на мај вратила повеќе територии отколку што изгубила.