Повеќе од 100 лица се приведени во Анкара за време на протест против НАТО, организиран од Комунистичката партија на Турција (ТКП) во пресрет на претстојниот самит на Алијансата.
Според турските медиуми, стотици демонстранти се обиделе да маршираат кон плоштадот Кизилај, иако во главниот град биле воведени забрани за јавни собири и засилени безбедносни мерки.
Од ТКП соопштија дека меѓу приведените има повеќе од 100 нивни членови. На видеоснимки објавени на социјалните мрежи се гледа како демонстрантите извикуваат антинатовски слогани, по што полицијата интервенира со солзавец за да ја растера толпата.
Паралелно со настаните во Анкара, во Истанбул се одржал уште еден протест во организација на истата партија. Демонстрантите марширале од плоштадот Таксим кон Долмабахче, а и покрај големото полициско присуство, таму не биле регистрирани посериозни инциденти.
Турските власти воведоа засилени безбедносни мерки пред самитот на НАТО, на кој се очекува учество на лидерите на 32 земји членки на Алијансата. Во рамки на мерките, во делови од Анкара се забранети јавни собири, затворени се улици и поставени се безбедносни кордони.
Според медиумските извештаи, паралелно со протестите, во одделни антитерористички операции низ Турција биле приведени уште 39 лица, меѓу кои новинари, активисти и универзитетски професори.
