Повеќе од 40 лица починале, а над 3.000 се заразени со колера во нигериската сојузна држава Борно, соопштија локалните власти, предупредувајќи дека станува збор за една од најсериозните здравствени кризи во регионот во последните години.
Епидемијата е регистрирана во периодот од 1 до 28 мај и досега се проширила во 139 заедници во седум локални административни области, меѓу кои Маидугури, Џере, Мафа, Кондуга, Монгуно, Нгала и Магумери.
Според извршниот секретар на државната агенција за здравствено осигурување, Салех Аба-Каза, првите сомнителни случаи биле пријавени на 1 мај, а епидемијата официјално била потврдена три дена подоцна.
Најтешко погодено е подрачјето на Маидугури, каде што се регистрирани повеќе од 2.000 случаи на зараза, додека во соседниот Џере се евидентирани над 1.000 заболени. Во последните 24 часа биле регистрирани повеќе од 100 нови случаи.
Властите соопштија дека преземаат засилени мерки за спречување на понатамошното ширење на болеста. Во здравствените установи се доставени лекови, медицински материјали и средства за дезинфекција, а пациентите добиваат бесплатна здравствена грижа.
Истовремено се спроведуваат информативни кампањи меѓу населението, а во погодените заедници се дистрибуираат таблети со хлор, средства за дезинфекција и друга санитарна опрема.
Сепак, болниците во Маидугури и Џере се соочуваат со сериозен притисок поради големиот број пациенти. Во некои центри за лекување дел од заболените се сместени на подот поради недостиг на простор, а меѓу заразените има голем број жени и деца.
Здравствените власти предупредуваат дека ширењето на колерата е поврзано со неисправни извори на вода, лоши санитарни услови и пренатрупани кампови за внатрешно раселени лица, каде што ризикот од зараза е особено висок.
