Повеќето компании во Европа користат вештачка интелигенција

Околу 70 проценти од компаниите во еврозоната веќе користат вештачка интелигенција, но само седум проценти сметаат дека таа има значајна улога во нивното секојдневно работење, покажува најновото истражување на Европската централна банка (ЕЦБ).

— реклама —

Анкетата, спроведена меѓу компании во еврозоната во текот на 2025 година, покажува дека примената на вештачката интелигенција значително се разликува меѓу земјите. Највисока стапка на користење е регистрирана во Холандија, Финска и Австрија, каде што повеќе од 80 проценти од компаниите користат AI, додека во Италија и Ирска тој удел е под 65 проценти.

Најголема примена на технологијата има во секторите за информатичка технологија, истражување и развој, додека градежниот сектор значително заостанува.

— реклама —

Компаниите најчесто ја воведуваат вештачката интелигенција за подобрување на деловните процеси, намалување на трошоците за работна сила, поттикнување на иновациите и развој на нови производи и услуги.

— реклама —

Како најголем предизвик за поширока примена се наведува недостигот од стручен кадар со знаење за вештачката интелигенција. Меѓу останатите пречки се заштитата на податоците, етичките дилеми и тешкотиите при интеграцијата на новите AI-системи со постојната технологија. Помалите компании, пак, често сметаат дека немаат доволно информации или не гледаат јасна корист од воведувањето на оваа технологија.

Од Европската централна банка наведуваат дека засега нема цврсти докази дека користењето на вештачката интелигенција автоматски ја зголемува продуктивноста кај сите компании. Сепак, во секторите за информатичка технологија и истражување и развој, дури и умерената употреба на AI е поврзана со поголема продуктивност.

Истражувањето не ги потврдува стравувањата дека вештачката интелигенција ќе доведе до намалување на бројот на вработени. Напротив, компаниите што ја применуваат оваа технологија почесто очекуваат раст на вработеноста, приходите и инвестициите. Според ЕЦБ, за поширока примена на AI ќе бидат неопходни поголеми вложувања во образование, дигитална инфраструктура, подобар пристап до финансирање и појасно информирање на компаниите.