Повеќето пожари во Хрватска ставени под контрола, активен останува пожарот кај Задар

Состојбата со пожарите во Далмација е подобрена, а повеќето пожари се ставени под контрола, со исклучок на пожарот кај Задар, изјави главниот пожарникарски командант на Хрватска, Славко Туцаковиќ.

— реклама —

Тој за N1 посочи дека ситуацијата кај Омиш во моментов е поволна, но предупреди на потребата од голема внимателност поради маестралот, кој почнал да дува. Пожарот на северната страна бил засилен, поради што интервенирале и „канадери“, но се очекува и тој наскоро да биде ставен под контрола.

Пожарот на Пељешац е под контрола на пожарникарите и нема негово натамошно ширење, додека под контрола е и пожарот кај Трогир. Активен останува пожарот во Нински Станови, но Туцаковиќ очекува и тој наскоро да биде ставен под контрола.

— реклама —

Во воздухот во моментов се четири „канадери“, а уште еден е подготвен на Брач и треба да се приклучи во гаснењето, со цел пожарите да бидат ставени под контрола пред ноќта.

— реклама —

Во меѓувреме, извршена е и замена на дел од пожарникарските сили. Во Далмација пристигнале дополнителни екипи од четири континентални жупании и од Загреб, додека пожарникарските сили од Загрепската жупанија се во резерва кај Вучевица и може да бидат испратени каде што ќе биде потребно.

Туцаковиќ повторно апелираше до граѓаните да не палат оган на отворено и да не оставаат жар, посочувајќи дека и покрај досегашните предупредувања, биле предизвикани големи последици по луѓето, имотот и природата.

— реклама —

Тој предупреди и дека по пожарите следува опасност од ерозија на почвата, бидејќи на опожарените места повеќе нема да има шума.