Двајца пациенти загинаа, а најмалку 34 лица се повредени во пожар што рано утрово избувнал во болницата во германскиот град Лудвигслуст. Во тек е целосна евакуација на установата, додека бројни екипи на итните служби интервенираат на местото на настанот.
Според првичните информации, пожарот избувнал во болничка соба, а потоа се проширил и кон покривот на Одделот за радиологија. Дојавата за пожарот била примена околу 4:30 часот, по што на терен биле испратени противпожарни екипи од Лудвигслуст и околните места.
Надлежните соопштија дека пожарот е ставен под контрола и повеќе нема отворен пламен, но спасувачките активности продолжуваат. Во тек е евакуација на сите пациенти, вклучувајќи ги и оние сместени во помошните објекти на болничкиот комплекс.
Пациентите се префрлаат на безбедни локации во рамките на болничкиот круг, додека одделот за итен прием, кој привремено беше затворен, повторно е ставен во функција.
Германските медиуми јавуваат дека засега нема официјални информации за тежината на повредите на повредените лица.
Поради густиот чад, локалните власти ги повикаа жителите во околината да ги држат затворени прозорците и вратите на своите домови. Пред болницата се собрале и голем број членови на семејствата на пациентите, кои чекаат информации за своите најблиски. За нив е отворена и посебна телефонска линија за поддршка.
