Површината на шумите во Амазонија зафатени од пожари во текот на 2025 година се намали на најниско ниво во последните четири децении, покажува годишниот извештај на бразилската иницијатива за следење на животната средина „MapBiomas“.
Според извештајот, пожарите минатата година зафатиле околу 3,1 милион хектари шума, што е приближно 80 проценти помалку во споредба со 2024 година. Намалување е забележано и на ниво на цел Бразил, каде што во 2025 година изгореле 12,7 милиони хектари, додека една година претходно биле уништени повеќе од 30 милиони хектари, кога земјата се соочи со силна суша.
Во посебен извештај „MapBiomas“ наведува дека водните површини во Амазонија повторно се зголемиле по две последователни години суша, благодарение на пообилните врнежи. Нивната површина била за околу 2,6 проценти поголема од историскиот просек.
Научникот Бруно Фереира оцени дека закрепнувањето е охрабрувачко, но предупреди дека долгорочната состојба и понатаму предизвикува загриженост поради сè почестите екстремни временски појави во регионот. Според него, климатските промени и промените во користењето на земјиштето имаат значително влијание врз нивото на водата.
Анализата на последните 40 години покажува дека повеќе од 49 проценти од сите површини зафатени од пожари се наоѓаат на приватно земјоделско земјиште, додека околу осум проценти се во населени места. Шумите често се сечат, а расчистеното земјиште потоа се пали за да се претвори во пасишта или обработливи површини, вклучително и за одгледување соја.
Во периоди на силна суша, ваквите пожари лесно можат да излезат од контрола и да се прошират. Од „MapBiomas“ посочуваат дека пожарите во Бразил можат да бидат предизвикани и од природни фактори и од човечка активност, но природните пожари се значително поретки во тропските дождовни шуми како Амазонија отколку во другите екосистеми.
Мрежата „MapBiomas“, составена од универзитети, невладини организации и технолошки компании, ги подготвува анализите врз основа на сателитски снимки и други релевантни податоци.
