Пожарот на депонијата кај селото Добрашинци е локализиран, но екипите на Територијалната противпожарна единица (ТППЕ) Струмица и понатаму остануваат на терен за негово целосно гаснење и обезбедување на локацијата.
Од ТППЕ Струмица информираат дека уште од раните утрински часови на терен интервенираат две противпожарни возила и шест пожарникари-спасители, кои континуирано работат на ликвидирање на пожарот.
Во интервенцијата активно е вклучено и ЈПКД „Комуналец“ – Струмица, чија механизација ја затрупува депонијата со цел да се спречи повторно разгорување на жариштата.
Пожарникарите посочуваат дека поради специфичноста на пожарите на депонии, и покрај тоа што огнот е ставен под контрола, потребно е подолго време за негово целосно гаснење.
Од ТППЕ Струмица апелираат до граѓаните да останат смирени, да не шират непроверени информации и да ги следат официјалните известувања. Воедно, упатија повик за совесно однесување и избегнување активности што можат да предизвикаат нови пожари.
Надлежните најавуваат дека ќе продолжат да ја следат состојбата сè до целосното ликвидирање на пожарот и навремено ќе ја информираат јавноста за понатамошниот развој на настанот.
