Центарот за управување со кризи (ЦУК) соопшти дека, согласно информациите од терен и направената проценка на состојбата, во координација со Дирекцијата за заштита и спасување (ДЗС), е изразена подготвеност за воздушна интервенција при гаснењето на пожарот кај Велес.
Од ЦУК информираат дека на располагање се ставени два воздухоплова на ДЗС, кои ќе полетаат од Аеродромот во Скопје веднаш штом временските услови и контролата на летање ќе го дозволат тоа.
Граѓани, сопственици на викендици, лозја и овоштарници, изразија загриженост поради ширењето на пожарот, кој, според првичните информации, излегол од контрола и се движи во правец кон селото Караслари. Пожарот првично избувнал во близина на експресниот пат Велес – Штип.
Надлежните институции и натаму ја следат состојбата на терен и ќе постапуваат согласно развојот на ситуацијата.
