Пожарот во Србија се шири со силниот ветер, над 1.500 хектари зафатени од огнот

Повеќе од 300 луѓе веќе четврти ден се борат со големиот пожар што ја зафати Делиблатската Песочара во Србија, а силниот ветер и високите температури значително ја отежнуваат интервенцијата.

Помошникот министер и началник на Секторот за вонредни ситуации, Лука Чаушиќ, денеска ги посети пожарникарите-спасители на теренот и оцени дека ситуацијата останува исклучително тешка и неизвесна.

— реклама —

Пожарот зафатил околу 1.500 хектари шума и ниска вегетација. На терен се ангажирани повеќе од 300 луѓе, околу 30 тешки работни машини, пожарникари-спасители, припадници на Војската на Србија, шумски служби, јавни претпријатија, доброволни пожарникари и граѓани.

Во гаснењето учествуваат и четири хеликоптери – три на Министерството за внатрешни работи и еден на Војската на Србија.

— реклама —

Особено тешка е ситуацијата во населеното место Шумарак, каде што пожарникарите ги штитат куќите. Како мерка за заштита, синоќа била извршена и превентивна евакуација на дел од населението.

Чаушиќ објасни дека поради конфигурацијата на теренот и силниот ветер, пожарот се опколува со противпожарни просеки. Екипите изградиле просека долга околу два километри и широка повеќе од 50 метри, но условите и натаму се неповолни.

— реклама —

„Најважно е никој да не настрада“, порача Чаушиќ, додавајќи дека приоритет е заштитата на куќите и шумското подрачје.

Тој истакна дека пожарникарите и другите екипи работат деноноќно и дека дел од нив веќе четири дена речиси и не спијат.

Во Србија во последните два до три дена биле регистрирани повеќе од 300 пожари. Чаушиќ апелираше до граѓаните да бидат особено внимателни поради високите температури и да не палат оган на отворено.

Пожарот во Делиблатската Песочара во моментов се оценува како најпредизвикувачкиот пожар во земјата. Активни се уште два пожари, од кои едниот е во непристапниот предел Столови, каде што гори главно ниска вегетација и трева.