Пожар избувна утрово на депонијата „Буково“ во Охрид, при што на терен веднаш се испратени екипи на ЈП „Охридски комуналец“ и Територијалната противпожарна единица – Охрид.
Од претпријатието информираат дека пожарот избувнал во дел од депонијата кој подолг период не се користи и на кој во изминатиот период не бил депониран отпад. Екипите работат на негово локализирање, а се врши и пресек со создавање заштитна линија за да се спречи понатамошното ширење на огнот.
Од ЈП „Охридски комуналец“ посочуваат дека во текот на 2026 година на депонијата „Буково“ досега се донесени и распоредени повеќе од 8.000 кубни метри земја, која се користи за прекривање и стабилизирање на делови од депонијата, како и за намалување на ризикот од појава и ширење на пожари.
Состојбата на теренот се следи непрекинато, а екипите ќе останат ангажирани до целосно ставање на пожарот под контрола.
Засега не е исклучена можноста пожарот да е намерно предизвикан. Причината за неговото избувнување ќе биде утврдена од надлежните институции по спроведување на соодветна постапка.
Од охридското комунално претпријатие велат дека остануваат во целосна координација со надлежните служби со цел спречување на ширењето на пожарот и заштита на околината.
