Скопските пожарникари успеале да го локализираат пожарот и да спречат огнената линија да навлезе во селото Грачани, откако пожарот од косовска страна преминал на македонска територија и го загрозил населеното место.
Огнената линија била долга повеќе од пет километри, а во гаснењето на пожарот на непристапниот терен клучна улога имале два „ертрактори“ на Дирекцијата за заштита и спасување (ДЗС), соопшти директорот Стојанче Ангелов.
Од теренот било потврдено дека со воздушната поддршка и добрата координација пожарникарите успеале да ја пресечат огнената линија, со што била спречена директна опасност за Грачани.
Во меѓувреме, активни се и други пожари низ државата. Како најтешко жариште е оценет пожарот на подрачјето меѓу Струга и Кичево. Утрово таму дејствувал армиски хеликоптер во поддршка на струшките пожарникари, а се очекува огнената линија наскоро да биде прекината и да не ги загрози околните села.
Во Студеничани активни се два пожара за кои постојат сомневања дека повторно биле намерно предизвикани. Според информациите, тие не претставуваат опасност за населените места и се очекува наскоро да бидат ставени под контрола.
Ангелов информираше дека во изминатото деноноќие биле регистрирани повеќе од 40 пожари на отворен простор и упати апел до граѓаните за максимална внимателност. И покрај најавените врнежи, опасноста од нови пожари останува многу висока.
