Пожарот кај Струмица се приближил до куќите: Огнот сопрен пред домовите, на терен и „Ер трактор“

Пожар што денеска околу пладне избувнал во близина на Струмица, меѓу селата Водоча и Баница, брзо се проширил поради силниот ветер и сувата вегетација, но огнот бил запрен пред да стигне до првите куќи.

Директорот на Центарот за управување со кризи, Стојанче Ангелов, изјави дека благодарение на брзата интервенција на струмичките пожарникари, со поддршка од колегите од Валандово и Радовиш, пожарот бил запрен пред да ги зафати домовите.

— реклама —

Градоначалникот на Струмица, Петар Јанков, потврди дека Територијалната противпожарна единица веднаш излегла на терен и спречила огнот да стигне до куќите и дворовите во Водоча. Дополнителна помош била побарана од противпожарните единици од Валандово и Радовиш, кои пристигнале уште во почетната фаза на пожарот.

„Пожарот, поради непредвидливото време, односно ветрот, постојано го менуваше правецот и се префрли од Водоча во правец на Баница, а потоа и од делот на Баница кон Струмица“, рече Јанков.

— реклама —

Тој додаде дека пожарникарите реагирале во близина на домовите и спречиле поголема материјална штета. Во гаснењето се вклучени и голем број доброволни противпожарни единици од околните места.

— реклама —

Во моментов на терен дејствува и авион „Ер трактор“, кој, според Ангелов, треба дополнително да придонесе за стабилизирање на состојбата со пожарот.

Ангажирана е и механизација за изработка на противпожарни препреки и за создавање заштитен појас. Според Ангелов, пожарот зафатил голема површина, што ја прави ситуацијата особено сериозна бидејќи огнот е во непосредна близина на урбаното подрачје на Струмица.

Јанков изјави дека во моментот нема опасност за куќите и викендичките, но предупреди дека, поради ветерот, ситуацијата и понатаму може да се промени.

Во активностите учествуваат и екипи на „Комуналец“ Струмица со својата механизација, кои помагаат во дополнувањето на резервите со вода за пожарникарите. Јанков упати благодарност и до општествено одговорните компании кои со својата механизација помогнале во создавањето заштитен појас за локализирање на пожарот.