Пожарот на „Пелистер“ локализиран, опасноста од ширење и натаму голема: Во гаснењето ќе се вклучат хеликоптер и два „ер трактори“

Пожарот што го зафати Националниот парк „Пелистер“ од страната на Преспа е локализиран, но опасноста од негово повторно ширење и натаму е голема, информира градоначалникот на Битола.

Тој посочи дека од вчера попладне, како и во текот на целата ноќ, е во координација со надлежните служби за справување со пожарот.

— реклама —

Од Битола се испратени екипи на Територијалната противпожарна единица, екипи од јавните претпријатија со механизација, како и приватни фирми со тешка механизација, со цел да помогнат во гаснењето на пожарот.

— реклама —

Градоначалникот информираше дека е во постојана комуникација и со директорот на НП „Пелистер“, Иванчо Тошевски, и директорот на Дирекцијата за заштита и спасување, Стојанче Ангелов.

Во текот на претпладнето се очекува во гаснењето да биде вклучен и хеликоптер, како и два „ер трактори“, додека на терен остануваат и екипите од Битола.

— реклама —

Градоначалникот упати апел до граѓаните за особено внимателно и одговорно однесување во шумите, со цел да се спречат нови пожари и поголема катастрофа.