Грчкиот актер Фотис Спирос ја потресе јавноста со искрената исповед за тешкото детство, семејното насилство и долгогодишната борба со зависноста од алкохол.
Во интервју за грчките медиуми, Спирос откри дека уште од најрана возраст бил свесен за својата сексуална ориентација, но признанието дека е хомосексуалец предизвикало сериозни проблеми во неговото семејство.
„Имав многу тешко детство и период на растење. Уште како дете сфатив дека сум геј, а тоа беше многу тешко и за мене, но особено за татко ми. Тој беше алкохоличар и ја малтретираше и мајка ми и мене“, изјавил актерот.
Спирос раскажал дека на 18-годишна возраст бил принуден да го напушти семејниот дом, по што се запишал во Театарот „Каролос Кун“, каде што ја пронашол својата животна определба.
„Сакав да бидам сакан и почитуван, затоа што тоа не го добив во сопственото семејство, поточно од татко ми“, рекол актерот.
И покрај сè што преживеал, тој нагласил дека не чувствува омраза кон својот татко и дека разбира дека неговите ставови биле производ на времето и воспитувањето во кое пораснал.
По заминувањето од домот, Спирос и самиот развил зависност од алкохол. Признал дека со години живеел во негирање на проблемот, а дури по две децении побарал стручна помош и влегол во програма за рехабилитација.
„Кога излегов од програмата, пред десет години, отидов кај сите луѓе на кои им нанесов болка и им се извинив. Некои ми простија, некои не, но тоа не можам да го променам“, изјавил тој.
Актерот истакнал дека најголемата поддршка низ сите тешки периоди во животот му била неговата мајка.
„Мајка ми е личност која ме обожава. Помина низ многу работи поради мене и мојата зависност. Таа е најдобрата личност на светот и не можам да го замислам животот без неа“, рекол Спирос.
