Пратеникот на СДСМ, Мартин Костовски, охрабрен од пишувањата на бугарскиот европратеник Андреј Ковачев кој најави дека ќе бидат јавно објавени сите кои имаат бугарски пасоши, го поддржа ваквиот став. Ковачев важи за провокатор и лице кое тврди дека Македонија е бугарска, а македонскиот јазик има корења од бугарскиот.
„Бугарија јавно ќе ги објави имињата на оние кои од други држави се здобиле со бугарско државјанство!!! Давам јавно предлог СЕКОЈ МАКЕДОНСКИ ПОЛИТИЧАР КОЈ ИМА БУГАРСКО ДРЖАВЈАНСТВО, во иднина да не се занимава со политика, еве мислам дека е доволно фер“, напиша Костовски.
Бугарскиот европратеник Андреј Ковачев, кој доаѓа од ГЕРБ на Бојко Борисов и се смета за влијателен во поставувањето на бугарската политика во овој сегмент, пред две години кажа дека македонскиот јазик е современа реалност која има недвосмислени бугарски корења.
Инаку, со најновите измени во предлог-законот за бугарско државјанство, кои се изгласани во прво читање од пратениците во бугарскиот парламент, се предвидува јавно објавување на регистарот на сите лица во Северна Македонија кои имаат бугарски пасош, објави бугарскиот европратеник Андреј Ковачев.
Ковачев, на својот фејсбук-профил, ја поздрави одлуката на сите бугарските парламентарци и додава дека со ова неговата битка која ја водел 10 години конечно ќе стане реалност.
