Правниот факултет во Загреб се огради од професорот кој ги советувал студентите во Србија

Раководството на Правниот факултет при Универзитетот во Загреб се огради од политичките активности на професорот Александар Маршавелски, кој им давал совети на студентите во Србија за нивното политичко организирање и дејствување против власта на Александар Вучиќ.

Од факултетот соопштиле дека за неговиот ангажман дознале од медиумите и дека претходно немале никакви информации за неговите активности. Оцениле дека начинот на кој професорот се вклучил во политичкото организирање на студентското движење во Србија е крајно невообичаен за универзитетски професор по право.

— реклама —

Во реакцијата се нагласува дека универзитетските професори уживаат академски и уставни слободи, но истовремено мора да ги исполнуваат своите наставни, научни и стручни обврски и јасно да ги одвојуваат личните општествени и политички ангажмани од институциите во кои работат.

— реклама —

Раководството најавило дека ги проверува околностите и дали активностите на Маршавелски биле целосно одвоени од неговата работа на факултетот. По завршувањето на проверките ќе одлучи за натамошното постапување кон него како вработен, а најавено е и официјално соопштение. Одговорот до новинарите го потпишала деканката Романа Матановац Вучковиќ.

Маршавелски предава на Катедрата за кривично право, а беше и член на Советот за граѓански надзор над безбедносно-разузнавачките агенции во Хрватска. Под псевдонимот „Пријател на студентите“, со месеци објавувал писма во српскиот весник „Данас“, во кои ги советувал студентите за нивното дејствување против власта на Вучиќ. Пред неколку дена јавно признал дека ги поттикнувал на политичко дејствување, предложил формирање стручна влада, отворање кон Европската Унија и советувал на нивната изборна листа да не биде радикално десничарскиот интелектуалец Мило Ломпар.

— реклама —

Неговото признание предизвикало реакции во дел од хрватската јавност и меѓу политичките партии. Во Србија, провладините медиуми го претставиле како доказ за наводно хрватско мешање во политичките процеси во земјата.

— реклама —

Хрватскиот парламент го именувал Маршавелски за член на Советот на 15 јули 2026 година. По избувнувањето на политичката афера, тој потврдил дека поднел неотповиклива оставка од функцијата.

Претседателот на собранискиот Одбор за внатрешна политика и национална безбедност, Ранко Остојиќ, потврдил дека Маршавелски имал важечки безбедносен сертификат и дека ја поминал безбедносната проверка при изборот за член на Советот во претходниот мандат. Тој посочил дека проверката може повторно да се побара доколку се појават нови информации или сомнежи. Во средата потврдил и дека од хрватската безбедносно-разузнавачка агенција СОА побарал информации за натамошно постапување на Одборот.