Грчките власти предупредија дека во близина на Јанинското Езеро е забележан волк.
Градските власти на Јанина соопштија дека, по пријави од граѓани за појава на дива животна во подрачјето покрај езерото, заменик-градоначалникот Арис Касис веднаш стапил во контакт со надлежните служби на Шумската управа во Јанина, кои се одговорни за постапување во вакви ситуации.
Според информациите, надлежните служби се наоѓаат на терен во популарната пешачка зона за да утврдат за какво животно станува збор, иако се претпоставува дека е волк, пренесува „Катимерини“.
Во соопштението се наведува дека општината Јанина, иако не е надлежна за управување со диви животни, реагирала брзо бидејќи животното се појавило во градско подрачје каде секојдневно се движат спортисти и семејства.
Надлежните служби посочиле дека ова не е прв ваков случај во областа и дека слични инциденти биле регистрирани пред околу две години, што се поврзува со постоењето сточарски фарми во поширокиот регион.
Општината апелираше граѓаните и туристите да не му приоѓаат на животното, да не го хранат и да не се обидуваат да го фотографираат одблиску, а во случај повторно да биде забележано веднаш да ја известат Шумската управа во Јанина.
