Зголемената распространетост на дебелината во Европа има сè поголеми последици и врз економиите, бидејќи државите издвојуваат значителни средства за лекување на здравствените последици, но и трпат загуби поради намалената работоспособност и продуктивност.
Анализа изработена за Европската федерација на фармацевтски индустрии покажува дека директните и индиректните трошоци поврзани со прекумерната телесна тежина изнесуваат меѓу 0,7 и 1,4 проценти од БДП на европските држави.
Германија има најголем вкупен финансиски товар, со повеќе од 55 милијарди евра годишно. Велика Британија следува со над 43 милијарди евра, додека Франција, Италија и Шпанија бележат трошоци од околу 20 милијарди евра годишно.
Разликите се забележуваат и кога трошокот се пресметува по жител. Во Романија тој изнесува околу 131 евро, додека во Германија достигнува 662 евра по жител.
Во директните трошоци се вбројуваат средствата за лекување на заболувања што се поврзуваат со прекумерната тежина, меѓу кои дијабетес тип 2, кардиоваскуларни заболувања, замастување на црниот дроб и хронични респираторни проблеми.
Дополнителен товар за економиите создаваат отсуствата од работа, намалената продуктивност и работоспособност, потребата од неформална грижа од страна на семејствата, како и загубите поврзани со прераната смртност.
Податоците покажуваат дека стапката на дебелина кај возрасните во Европа е зголемена за повеќе од 75 проценти во однос на 1990 година. Истовремено, проценките укажуваат дека до 2035 година речиси половина од светското население би можело да има прекумерна телесна тежина.
Поради ваквиот тренд, здравствените и економските стручњаци укажуваат на потребата од поефикасна превенција и системски пристап кон лекувањето, со цел да се намалат и здравствените и економските последици.
