Пратеникот од ВМРО-ДПМНЕ, Љупчо Пренџов, на денешната седница на Комисијата за финансирање и Буџет упати критики кон пратениците од СДСМ, оценувајќи дека нивните најекспонирани економски кадри не присуствуваат на расправата за ребалансот на Буџетот.
„Каде е велелепниот економист на Социјалдемократскиот сојуз, Фатмир Битиќи? Каде се Ковачевски, Оливер и останатите? Ако имаат аргументи против Буџетот, треба да дојдат и да ги кажат“, рече Пренџов.
Тој изјави дека економските показатели, според него, покажуваат позитивни резултати и ја спореди актуелната Влада со претходната.
„Просечниот раст на БДП во времето на СДС беше 1,1 процент. Денес економијата расте три и пол пати повеќе. Оваа Влада е три и пол пати поуспешна од вашата“, истакна Пренџов.
Пратеникот додаде дека растот на бруто-домашниот производ е основен показател за состојбата во економијата и оцени дека актуелните економски движења се доказ дека државата се движи во добра насока.
Во своето обраќање тој нагласи дека ребалансот на Буџетот, според него, е заснован на реални економски показатели, а критиките од опозицијата ги оцени како политички флоскули без конкретни аргументи.
