Социјалните мрежи и видеоплатформите за првпат станаа најкористениот извор на информации во светот, надминувајќи ги телевизијата, порталите и останатите традиционални медиуми, покажува најновиот извештај на Институтот за новинарство на Ројтерс при Универзитетот во Оксфорд.
Истражувањето, спроведено меѓу речиси 100.000 испитаници во 48 земји, открива дека 54 проценти од анкетираните во текот на претходната недела следеле вести преку социјални мрежи и видеоплатформи. Доколку се вклучат и алатките со вештачка интелигенција, како ChatGPT, процентот се зголемува на 56.
За споредба, телевизијата како извор на информации ја навеле 52 проценти од испитаниците, интернет-страниците и апликациите на традиционалните медиуми 51 процент, а радиото 21 процент.
Авторот на извештајот, Џим Иган, оваа промена ја оценува како значајна пресвртница во начинот на кој луѓето се информираат.
Особено изразен е трендот кај младите. Половина од лицата на возраст од 18 до 24 години изјавиле дека социјалните мрежи и видеоплатформите се нивен главен извор на вести. Телевизијата, пак, останува доминантна само кај луѓето постари од 45 години.
Извештајот предупредува и на сериозни предизвици за традиционалните медиуми. Само 17 проценти од испитаниците плаќаат за онлајн вести, додека голем дел од приходите од рекламирање се прелеваат кон технолошките гиганти како Google и Meta.
Воедно, довербата во медиумите продолжува да опаѓа. Само 37 проценти од анкетираните изјавиле дека им веруваат на „повеќето вести во поголемиот дел од времето“, што претставува најниско ниво досега.
Сè повеќе луѓе се информираат и преку алатки со вештачка интелигенција. Околу 10 проценти од испитаниците рекле дека неделно користат АИ чет-ботови за следење вести, што е пораст во однос на седумте проценти забележани минатата година.
Според Иган, брзиот развој на генеративната вештачка интелигенција претставува најголемиот предизвик со кој денес се соочуваат медиумските куќи и носителите на политики, во време на големи геополитички и технолошки промени.
