Поради основано сомнение дека сториле кривично дело насилничко однесување, истражниот судија на Жупанискиот суд во Дубровник на пет млади момчиња од областа Дубровник им изрече мерка притвор до 30 дена, пренесува „Слободна Далмација“, додавајќи дека тие се обвинети дека ставиле четворица мажи – еден Хрват, двајца државјани на Босна и Херцеговина и еден државјанин на Македонија, во понижувачка положба со насилство, злоупотреба, и друго особено дрско однесување на јавно место.
Според судијата Пер Милоглав, портпарол на Жупанискиот суд во Дубровник, притворот е одреден во однос на начинот и околностите на извршување на кривичното дело насилничко однесување, бидејќи при физичкиот напад врз сезонските работници покажале екстремни агресивност, непромисленост и бруталност, како и поради опасност од повторување на кривично дело.
Предложен е притвор за Л.Ф.(22), Ј.Т. (19), Р.Т. (21), М.Г. (18) и Ј.К. (18).
Полицијата веќе извести дека бруталното претепување на четворица сезонски работници од синџирот хотели „Валамар Ривиера“ дошло по ноќно излегување и вербален конфликт во Пилес. Инцидентот се случил на 1 јули околу 5 часот пред ноќниот бар „Еликс“, кога сезонските работници за да избегнат понатамошен конфликт со такси го напуштиле местото и отишле во нивниот сместувачки објект во месноста Бабино кук, зграда во близина на кружниот тек во Солитуд.
Но, групата осомничени ги следела и откако работниците се симнале, физички ги нападнале и на тројцата им нанеле полесни физички повреди.
Додека физички ги удирале, осомничените ги навредувале на национална основа, со што кај жртвите се создавало чувство на страв, понижување и нарушено достоинство.
Младите насилници се уапсени и предадени на надзорникот на притворот на СВР Дубровник-Неретва, по што се изведени пред дежурниот судија, кој им одредил мерка притвор.
