Претрес во виничко: Уапсени две лица, запленети кокаин, канабис, пушка и пари

Две лица од виничкото село Јакимово се приведени и им е одреден притвор по полициска акција во која биле пронајдени дрога, пушка и други предмети поврзани со кривично дело.

— реклама —

Од Министерството за внатрешни работи информираат дека на 11 јули околу 23:20 часот, полициски службеници од Надворешната канцеларија за криминалистички работи Виница, во содејство со ОВР Виница, ги лишиле од слобода К.С. (28) и М.С. (31), двајцата од село Јакимово.

— реклама —

При спроведување на претходно планирана акција, полицијата се обидела да запре патничко возило „Фолксваген“ со винички регистарски ознаки, управувано од К.С., додека М.С. бил сопатник. Во текот на контролата, од возилото бил фрлен кокаин.

Следниот ден, врз основа на судска наредба, бил извршен претрес во домот и просториите што ги користеле двајцата осомничени. При претресот биле пронајдени и одземени кокаин, канабис, дробилка со остатоци од канабис, воздушна пушка „Валтер“ со калибар 4,5 милиметри, пари и други предмети за кои постои сомнение дека потекнуваат од кривично дело.

— реклама —

Против двајцата е поднесена кривична пријава поради сомнение за сторено кривично дело „неовластено производство и пуштање во промет на наркотични дроги, психотропни супстанци и прекурсори“.

— реклама —

По изведувањето пред судија на претходна постапка во Основниот суд во Кочани, на двајцата им е одредена мерка притвор.