Претреси во Брњарци, пронајдени дрога, оружје и муниција, уапсени две лица

Две лица се лишени од слобода во одделни полициски акции во скопското село Брњарци, при што во нивните домови биле пронајдени дрога, оружје, муниција и опрема за изработка и полнење патрони.

— реклама —

Како што соопшти МВР, на 16 септември во 00:20 часот, полициски службеници од Единицата за недозволена трговија при СВР Скопје го лишиле од слобода Д.Ц. (34) од Брњарци.

— реклама —

При претресот на неговиот дом, извршен со наредба од Основен суд Скопје, биле пронајдени и одземени марихуана, семки од растението канабис и дигитална вага со остатоци од марихуана.

Претходно, на 15 септември во 23:45 часот, во истото село бил лишен од слобода и И.Б. (38) од Скопје.

— реклама —

При претресот во неговиот дом, извршен со наредба од Основниот кривичен суд Скопје, биле пронајдени и одземени пиштол, 23 куршуми, 20 ловечки патрони, една ќеса со барут, три конзерви со сачми, три конзерви со материјал за полнење ловечки патрони, една кутија со каписли, како и алатки за изработка и полнење патрони.

— реклама —

Од МВР информираат дека по целосното документирање на случаите против двете лица ќе бидат поднесени соодветни пријави.