Претседателот на ФИФА, Џани Инфантино, испрати писмо со честитка до претседателот на Фудбалската асоцијација на Аргентина, Клаудио Тапија, во кое го пофали настапот на аргентинската репрезентација на големиот турнир, иако „гаучосите“ останаа без трофејот по поразот од Шпанија со 1:0 во финалето.
Во пораката, објавена на официјалната интернет-страница на аргентинската федерација, Инфантино истакна дека Аргентина со своите настапи дала значаен придонес турнирот да биде успешен и да привлече милиони љубители на фудбалот ширум светот.
„Брилијантната игра на Аргентина беше клучна ова првенство да стане извонреден настан што привлече милиони навивачи. Искрено им честитам на играчите, селекторот Лионел Скалони, стручниот и медицинскиот штаб, како и на сите навивачи кои го поддржуваа тимот во текот на турнирот“, порача Инфантино.
На крајот од писмото, првиот човек на ФИФА, кој со Тапија соработува и во Советот на организацијата, изрази надеж дека наскоро повторно ќе се сретнат.
Сепак, честитката доаѓа во период кога Аргентина се соочува со можни дисциплински мерки. ФИФА веќе отвори постапки поради инцидентите по финалниот натпревар, како и поради транспарентот што аргентинските фудбалери го истакнаа по победата над Англија во полуфиналето, на кој пишуваше: „Малвините се аргентински“.
