Пријателот на Тоше: „Со триста маки создадовме традиција, а сега не ни дозволија да продолжиме“

Три години по ред во Крушево се одржуваше концерт во чест на Тоше Проески, пред неговата Спомен-куќа, но годинава традицијата е прекината. Стерули Штерјоски, пријател на Тоше и еден од луѓето кои стоеле зад организацијата на концертите, јавно реагираше дека не им било дозволено да продолжат со настанот, кој бил посветен на зачувување на споменот за македонската музичка легенда.

Во емотивна објава, Штерјоски се наврати на 5 октомври, датумот кога Тоше го одржа својот последен концерт, и на идејата токму на тој ден Крушево секоја година да му оддава музичка почит.

„Пред четири години, во 2022, со триста маки, труд и голема љубов, за првпат успеавме еден таков концерт да се одржи во Крушево – пред Спомен-куќата на Тоше“, напиша Штерјоски.

— реклама —

Тој потсети дека на концертот учествувале Камерен оркестар, целиот бенд на Тоше, како и познати музички имиња од Македонија и Балканот.

„Тоа беше вечер која тешко се опишува со зборови. Верувавме дека Тоше, од небото, се радуваше што неговиот град пее за него“, наведе тој.

— реклама —

Според Штерјоски, три последователни години организаторите се обидувале концертот да го претворат во трајна традиција, со која ќе се зачуваат ликот, делото и музичкото наследство на Тоше Проески.

Но, на 5 октомври годинава, наместо концерт, во Крушево немало продолжување на манифестацијата.

„А денес, 5 октомври 2026 година – тишина. Нема концерт. Нема продолжување на традицијата. Не ни дозволија да продолжиме со она што го започнавме со толку љубов и мака“, напиша Штерјоски.

— реклама —

Тој не прецизира кој не дозволил концертот да продолжи, ниту ги наведе причините поради кои годинава не се одржал.

„Жал ми е… не затоа што нешто сме изгубиле ние, туку затоа што Крушево и Тоше заслужуваа ова да продолжи“, порача пријателот на Тоше.

Штерјоски нагласи дека, без оглед на прекинот на концертите, љубовта кон Тоше и спомените од претходните музички вечери остануваат.

„Ние можеби можеме да бидеме спречени да организираме, но никој не може да ни ја земе љубовта со која го правевме тоа. Тоше останува. Неговата песна останува. А споменот на тие прекрасни вечери пред неговата Спомен-куќа ќе остане засекогаш“, напиша тој.

Објавата ја заврши со зборовите: „5 октомври – ден кога срцето уште посилно боли. За Тоше. Засекогаш“.