Прилеп со нови хируршки зафати: две сложени операции успешно изведени за првпат

Пациентите во Прилеп отсега ќе можат да добијат нови хируршки третмани за сложени скршеници и сериозни оштетувања на зглобовите, откако на Ортопедско-трауматолошкото одделение при Општата болница со проширена дејност за првпат успешно беа изведени две оперативни интервенции.

Од болницата информираат дека двете методи ќе станат дел од редовната оперативна практика, со што ќе се овозможи ваквите зафати да се изведуваат во Прилеп, без пациентите да мора да одат во други медицински центри.

— реклама —

Едната интервенција е артродеза на скочниот зглоб, која се применува кај пациенти со напредната артроза и сериозно оштетување на зглобните површини. Со неа се постигнува стабилизација и трајно спојување на зглобот, со цел да се намали хроничната болка и да се подобри функционалноста на екстремитетот.

— реклама —

Втората метода е ретроградна остеосинтеза на бутната коска, хируршка постапка за лекување скршеници во нејзиниот долен дел. Таа овозможува стабилно фиксирање на коскените фрагменти и правилно зараснување на коската.

Од болницата посочуваат дека кај двете интервенции се применува интрамедуларна фиксација, односно поставување специјални импланти во внатрешниот канал на коската. Овој минимално инвазивен пристап овозможува подобро зачувување на околните меки ткива, помала загуба на крв и намалена оперативна траума.

— реклама —

Во зависност од тежината на повредата и здравствената состојба на пациентот, овие техники можат да придонесат и за намалување на одредени постоперативни ризици и полесно закрепнување.

Успешната примена на новите методи, како што наведуваат од установата, е резултат на стручноста, посветеноста и постојаното усовршување на медицинскиот тим.

Со воведувањето на овие интервенции, прилепската болница ги проширува можностите за лекување сложени скршеници и напредни дегенеративни заболувања на зглобовите.