Принцот Вилијам, наследник на британскиот престол, според најновите годишни финансиски извештаи на Sovereign Grant, располага со нето богатство од околу 1,6 милијарди долари, со што го надмина својот татко, кралот Чарлс Трети.
До ова богатство Вилијам дошол благодарение на Војводството Корнвол – приватен кралски имот што го презеде во 2022 година, кога Чарлс стана крал. Според објавените податоци, принцот во фискалната 2025/2026 година остварил приватен приход од 28,5 милиони долари, а откако стана принц од Велс, наводно платил повеќе од 26 милиони долари данок.
За разлика од него, кралот Чарлс сè уште не го достигнал статусот на милијардер. Според најновата листа на Sunday Times Rich List, личното богатство на 77-годишниот британски монарх се проценува на 846 милиони долари, што е за речиси 40 милиони долари повеќе во споредба со минатата година.
Војводството Корнвол е главниот извор на приходи на Вилијам и ги финансира неговите службени, хуманитарни и приватни активности, како и активностите на неговата сопруга Кетрин, принцезата од Велс, и нивните три деца.
Имотот бил основан во 1337 година од кралот Едвард Трети со цел да обезбеди приходи за наследникот на престолот, а денес се простира на околу 205 квадратни милји земјиште во повеќе од 20 окрузи низ Обединетото Кралство.
Според весникот The Times, принцот Вилијам планира во следните десет години да продаде околу 20 проценти од имотот, а повеќе од 670 милиони долари да ги насочи кон изградба на станови и проекти за заштита на природата.
„Можеме да направиме многу добро. Се обидувам приоритет да им дадам на проектите што ќе го подобрат животот на луѓето кои живеат во тие области“, изјавил принцот.
Кралот Чарлс управувал со Војводството Корнвол цели 53 години – од 1969 до септември 2022 година, кога по смртта на кралицата Елизабета Втора контролата му ја предаде на Вилијам. По доаѓањето на престолот, Чарлс наследи и дел од приватниот имот на покојната кралица, вклучувајќи ги замокот Балморал и имотот Сандрингам.
